2023 жылғы 26 қыркүйек күні Қазақстан Республикасының Ғылым және жоғары білім министрлігі Тіл саясаты комитетінің «Мемлекеттік және ана тілдерін оқыту бойынша оқу-әдістемелік құралдарды әзірлеу» жөніндегі тапсырмасы бойынша Ш.Шаяхметов атындағы «Тіл-Қазына» ұлттық ғылыми-практикалық орталығы дайын өнімдерді іріктеу мақсатында сараптама комиссиясының отырысын өткізді.
Қазақстан Республикасында Тіл саясатын іске асырудың 2020-2025 жылдарға арналған мемлекеттік бағдарламасы аясында «Мемлекеттік және ана тілдерін оқыту бойынша оқу-әдістемелік құралдарды әзірлеу, шығару жәнетаратуды» жүзеге асыру мақсатында ұсынылған оқу-әдістемелік құралдардың ішінен үздіктерін іріктеу үшін арнайы құрылған сараптау комиссиясы бірден жұмысына кірісіп кетті.
Әділін айту керек, еліміздің түкпір-түкпіріндегі Тілдерді оқыту орталықтары әдеттегідей белсенділік танытып, бұл жолы мемлекеттік тілді оқытуға арналған 30-ға жуық оқу-әдістемелік өнімді сараптама комиссиясының талқысына ұсынды. Әсіресе, Павлодар, Қызылорда, Алматы,Қостанай, Жетісу, Абай,Түркістан, Жамбыл, Қарағанды облыстары қызу атсалысты. Сондай-ақ еліміздің жеке тұлғалары мен басқа да мүдделі мекемелер бақ сынасты.
Ұйымдастырушылардың айтуынша, жылдан-жылға ұсынылған өнімдердің санымен бірге, сапасы да жақсарып келе жатқан көрінеді. Енді іріктеуден өткен бұл туындылар кітап ретінде баспа жүзін көретін болады.
