2023 жылғы 13 қазанда Республикалық терминология комиссиясының 3-отырысы өтті. Комиссия отырысында күн тәртібіне сәйкес ҚР Энергетика министрлігі бекітуге ұсынған терминдер, қоғамдық тамақтану саласы, жаратылыстану (мектеп оқулықтары бойынша), математика (мектеп оқулықтары бойынша) саласының терминдері қаралды. Аталған терминдердің бәріне де алдын ала ғылыми-лингвистикалық сараптама жасалып, комиссияның талдауына «termincom.kz» сайтындағы «Алаң» бөліміне орналастырылды.
Алаңға жалпы 841 термин салынды, соның 593-і жүз пайыздан дауыс жинады. Қалған 248 термин отырыста талқыланды. Отырысқа Республикалық терминология комиссиясының мүшелері, сала мамандары қатысты. Комиссия шешіміне сәйкес мақұлданған терминдер «Терминологиялық хабаршы» электронды журналында және «termincom.kz» сайтының «Термин» бөлімінде жарияланады.
