Мақтаарал ауданында халықтың өмір сүру сапасын арттыруға бағытталған инфрақұрылымдық жобалар кезең-кезеңімен жүзеге асырылуда. Осыған орай аудан әкімі Бақыт Асанов Жаңажол ауылдық округіне қарасты Фирдауси ауылында болып, жаңадан пайдалануға берілген әкімшілік ғимараттың жұмысымен танысты.
Заманауи талаптарға сай салынған әкімшілік ғимарат толық пайдалануға беріліп, Жаңажол ауылдық округі әкімі аппараты жаңа ғимаратқа көшкен. Нысан табиғи газ, электр энергиясы және кәріз жүйесімен толық қамтылған. Жалпы аумағы 24,78 соттық жерді алып жатқан ғимаратта тоғыз қызметтік кабинет, мәжіліс залы, қабылдау аймағы және санитарлық торап қарастырылған.
Іссапар барысында аудан басшысы Фирдауси ауылында бой көтерген 100 пәтерлік 50 тұрғын үйдің жай-күйімен де танысты. Жалпы ауданы 63 шаршы метрді құрайтын әрбір тұрғын үй 7 соттық жер телімінде орналасқан және ауыз су, табиғи газ, электр энергиясы, автомобиль жолы секілді қажетті инженерлік инфрақұрылыммен толық қамтамасыз етілген. Қазіргі таңда тұрғын үйлер орналасқан аумақта абаттандыру және жол құрылысы жұмыстары жүргізілуде.
Аудан әкімі құрылыс сапасына ерекше назар аударып, жауапты сала басшылары мен мердігер мекемелерге барлық жұмысты белгіленген мерзімде әрі сапалы аяқтауды тапсырды.
Тұрғын үй кешені орналасқан аумақта абаттандыру жұмыстарына ерекше көңіл бөлінуде. Атап айтқанда, көшелерді жарықтандыру, жаяу жүргіншілер жолдарын салу, көгалдандыру, балалар ойын алаңдары мен демалыс аймақтарын ұйымдастыру көзделген. Бұл тұрғындардың күнделікті тұрмысын жеңілдетіп қана қоймай, жаңа шағынауданның толыққанды әлеуметтік орта ретінде қалыптасуына ықпал етеді. Сонымен қатар, инженерлік-коммуналдық желілердің сапалы жүргізілуі тұрғындардың барлық коммуналдық қызметтерді үздіксіз пайдалануына мүмкіндік береді.
Жаңадан пайдалануға берілген әкімшілік ғимарат мемлекеттік қызмет көрсету сапасын арттыруға және тұрғындарға қолайлы жағдай жасауға бағытталған. Кең әрі заманауи талаптарға сай жабдықталған ғимаратта азаматтарды қабылдау, мемлекеттік қызметтерді көрсету және ауылдық округтің әкімшілік жұмысын тиімді ұйымдастыру үшін барлық қажетті жағдай қарастырылған. Бұл мемлекеттік қызметтердің қолжетімділігін арттырып, халық пен жергілікті атқарушы органдар арасындағы байланысты одан әрі нығайтуға ықпал етеді.
Мақтаарал ауданында тұрғын үй құрылысы мен әлеуметтік инфрақұрылымды дамыту бағытындағы жұмыстар алдағы уақытта да жүйелі түрде жалғасады. Бұл жобалар Мемлекет басшысының халықты қолжетімді баспанамен қамтамасыз ету, ауылдық елді мекендердің инженерлік инфрақұрылымын жаңғырту және тұрғындардың өмір сүру сапасын арттыру жөніндегі тапсырмаларын іске асырудың маңызды бөлігі болып табылады. Биыл пайдалануға берілетін 100 пәтер жаңа қоныстанушылар үшін жайлы өмір сүруге мүмкіндік жасап қана қоймай, ауданның әлеуметтік-экономикалық дамуына және ауылдардың көркеюіне елеулі үлес қосады.
