Сауран ауданында жылына 464 млн дана биологиялық белсенді қоспа шығаратын өндіріс бой көтеріп, 500 адам тұрақты жұмыспен қамтылмақ
Түркістан облысының өндірістік картасына тағы бір ірі жоба қосылды. Сауран ауданындағы «Turan» арнайы экономикалық аймағының «Ораңғай» қосалқы экономикалық аймағында биологиялық белсенді қоспалар өндіретін заманауи зауыттың құрылысы басталды.
Жаңа кәсіпорынның іргетасының қалануы – өңір үшін ғана емес, отандық өндіріс үшін де маңызды қадам. Себебі Қазақстанда фармацевтикалық және денсаулыққа қажетті өнімдердің едәуір бөлігі сырттан әкелінеді. Енді сол нарықтың бір бөлігін Түркістанда өндірілген өніммен қамту көзделіп отыр.
Жобаны «Orzax Central Asia» компаниясы жүзеге асырады. Инвестиция көлемі – 20,4 млрд теңге. Кәсіпорынға 10 гектар жер бөлінген. Құрылыс 2026-2027 жылдары жүргізіледі.
Зауыт толық қуатына шыққанда жылына 464 млн дана биологиялық белсенді қоспа өндіре алады. Ең бастысы – жаңа өндірісте 500-ге жуық адам тұрақты жұмыспен қамтылады.
ИМПОРТТЫҢ ОРНЫН ОТАНДЫҚ ӨНІМ БАСА МА?
Түркістан облысы соңғы жылдары ауыл шаруашылығымен ғана шектелмей, өңдеу өнеркәсібін дамытуға басымдық беріп келеді. Мақта-тоқыма, ет, жүгері және жиһаз кластерлерімен қатар, енді фармацевтикалық бағыт та өңірдің өндірістік әлеуетіне айналмақ.
Облыс әкімі Нұралхан Көшеровтің айтуынша, өңірдегі фармацевтикалық өнімдер нарығының шамамен 100 млрд теңгесі импортқа тәуелді.
Бұл – жаңа зауыт үшін үлкен нарық бар деген сөз.
– Экономиканың шикізаттық моделінен бет бұрып, импортты алмастыруға бағытталған нақты жобаларды кезең-кезеңімен жүзеге асырып келеміз. Денсаулыққа қажетті өнімдерді өз елімізде өндіру – ұлттық қауіпсіздіктің маңызды кепілі, – деді облыс әкімі.
Бұған дейін өңірде импортты алмастыру бағытында 176 млрд теңгені құрайтын 31 жоба іске қосылған. Биыл жалпы құны 280 млрд теңге болатын 39 жоба жүзеге асырылып жатыр.
Яғни Түркістанда өндіріс саласының бағыты өзгеріп келеді: шикізатты ғана өндіру емес, оны өңдеу, дайын өнім шығару және ішкі нарықты қамтамасыз етуге басымдық берілуде.
ТҮРКИЯ ТӘЖІРИБЕСІ ТҮРКІСТАНҒА КЕЛЕДІ
Жобаның тағы бір ерекшелігі – кәсіпорынның артында үлкен өндірістік тәжірибесі бар түркиялық компания тұр.
«Orzax Central Asia» ЖШС-нің құрылтайшысы – биологиялық белсенді қоспалар өндірісі бойынша Түркиядағы жетекші компаниялардың бірі саналатын «Orzaks Pharmaceuticals and Chemical Industry Inc» корпорациясы.
Компания бүгінде әлемнің 50-ден астам еліне 150-ден астам өнім түрін экспорттайды.
Енді осы тәжірибенің бір бөлігі Түркістанда қолданылмақ.
Жобаның өңірде жүзеге асуы кездейсоқ емес. «Turan» арнайы экономикалық аймағы инвесторларға өндіріс орналастыруға қолайлы жағдай жасауға бағытталған. Инфрақұрылымы дайын өндірістік алаңдар мен инвестициялық жобаларға көрсетілетін қолдау Түркістанның жаңа кәсіпорындар үшін тартымдылығын арттырып отыр.
500 ЖАҢА ЖҰМЫС ОРНЫ
Кез келген инвестициялық жобаның экономикалық көрсеткішінен бөлек, оның халыққа беретін нақты пайдасы маңызды.
Бұл ретте жаңа зауыттың 500 адамды тұрақты жұмыспен қамтуы – Сауран ауданы үшін елеулі мүмкіндік.
Өндірістің іске қосылуы тек жұмыс орындарымен шектелмейді. Кәсіпорынның айналасында логистика, қызмет көрсету, техникалық мамандықтар, қаптама және басқа да қосымша бағыттардың дамуына жол ашылады.
Бұдан бөлек, жергілікті мамандардың заманауи өндіріс технологияларымен жұмыс істеуіне мүмкіндік туады.
ТҮРКІСТАННЫҢ ӨНДІРІСТІК КЕЛБЕТІ ӨЗГЕРІП КЕЛЕДІ
Зауыт құрылысының басталуымен Түркістан облысының индустриялық дамуындағы жаңа бағыт айқындала түсті.
Бір кездері өңірдің экономикасы көбіне ауыл шаруашылығымен байланыстырылса, бүгінде мұнда заманауи өндіріс орындары, өңдеу кәсіпорындары мен ірі инвестициялық жобалар бой көтеріп жатыр.
Ал Саурандағы жаңа зауыт осы өзгерістің маңызды бір бөлігі болмақ.
20,4 млрд теңге инвестиция, жылына 464 млн дана өнім және 500 тұрақты жұмыс орны – бұл жай ғана жаңа кәсіпорынның көрсеткіштері емес. Бұл Түркістанның импортты алмастыратын, экспортқа бағытталған өндіріс орталығына айналу жолындағы нақты қадам.
Зауыттың уақыт капсуласы салынған сәтте бір нәрсе анық болды: Түркістанда енді жаңа тарих тек көне қалалардың орнында ғана емес, заманауи өндіріс орындарының іргетасында да жазыла бастады.
