Түркістан қаласында жол-көлік инфрақұрылымын дамыту бағытындағы жұмыстар жүйелі түрде жүзеге асырылуда. Осы мақсатта қала әкімі Әзімбек Пазылбекұлы кезекті жұмыс сапары барысында бірқатар көшелерді аралап, жол құрылысы және қалпына келтіру жұмыстарының орындалу барысын тексерді. Қазіргі таңда 20 көшеде асфальт төсеу жұмыстары жүргізілуде. Жалпы биыл 173 көшені жөндеу жұмыстарына сараптама қорытындысы алынған.
Жұмыс сапары аясында қала басшысы Яссы секторына қарасты Домалақ ана көшесіндегі орташа жөндеу жұмыстарымен танысты. Ұзындығы 840 метр, ені 6 метр болатын көшеде жобаға сәйкес екі қабат асфальт-бетон жабынын төсеу және жаяу жүргіншілер жолын салу көзделген. Қазіргі таңда бірінші қабат асфальт жабыны толық төселіп, аяқ жол құрылысы аяқталған. Бүгінде асфальттың екінші қабатын төсеу жұмыстары қарқынды жүргізілуде. Жоспарға сәйкес, нысан биыл шілде айының соңына дейін толық аяқталады.
Сонымен қатар, Әзімбек Пазылбекұлы Сауран секторына қарасты Майлин көшесінде кәріз жүйесін жүргізу жұмыстары аяқталғаннан кейінгі жолды қалпына келтіру барысын бақылап, жауапты мердігерге бірқатар тапсырмалар берді. Жол жабынының сапасына қатысты қайта қырып салуды, құрылыс нормалары мен технологиялық талаптарды қатаң сақтауды тапсырды.
Жолдарды жөндеу және жаңғырту жұмыстары қала тұрғындарының қауіпсіз әрі қолайлы қозғалысын қамтамасыз етуге бағытталған маңызды инфрақұрылымдық жобалардың бірі болып табылады. Сапалы жол желісінің қалыптасуы көлік қозғалысын жеңілдетіп қана қоймай, жол-көлік оқиғаларының алдын алуға, қоғамдық көліктің тиімді жұмыс істеуіне және тұрғындардың күнделікті қатынау уақытын қысқартуға мүмкіндік береді. Сонымен қатар, жаңа жолдардың салынуы мен қолданыстағы көшелердің жаңартылуы қаланың сәулеттік келбетін жақсартып, тұрғындар үшін жайлы қалалық орта қалыптастыруға ықпал етеді.
Жөндеу жұмыстары барысында құрылыс материалдарының сапасына және технологиялық талаптардың сақталуына ерекше көңіл бөлінуде. Әрбір нысан техникалық және авторлық қадағалау аясында бақылауға алынып, құрылыс жұмыстарының барлық кезеңі белгіленген мемлекеттік стандарттарға сәйкес жүргізілуде. Бұл жолдардың ұзақ мерзім бойы сапалы қызмет етуін қамтамасыз етіп, бюджет қаражатының тиімді жұмсалуына мүмкіндік береді. Сонымен қатар, инженерлік желілер толық аяқталғаннан кейін ғана жолдарды қалпына келтіру жұмыстары жүргізіліп, қайта қазу мәселесінің алдын алуға басымдық берілуде.
Қала аумағында жол-көлік инфрақұрылымын дамыту жұмыстары кешенді түрде жүзеге асырылуда. Көшелерді жөндеумен қатар жаяу жүргіншілер жолдарын салу, көше жарығын жаңарту, су бұру жүйелерін ретке келтіру және жол қозғалысы қауіпсіздігін қамтамасыз ететін белгілер мен жолақтарды орнату жұмыстары қатар атқарылуда. Бұл өз кезегінде тұрғындардың өмір сүру сапасын арттырып, қаладағы көлік қатынасының тиімділігін жоғарылатады.
