Сарыағаш ауданында әлеуметтік инфрақұрылымды дамыту және өскелең ұрпаққа қолайлы жағдай жасау бағытындағы жұмыстар жүйелі түрде жүзеге асырылуда. Солардың бірі – Сарыағаш қаласында салынып жатқан балалар мен жасөспірімдерге арналған көпфункционалды дамыту орталығы.
Аудан әкімі Арман Абдуллаев құрылыс нысанына арнайы барып, атқарылып жатқан жұмыстардың барысымен танысты. Ол мердігер мекеме өкілдерімен кездесіп, құрылыс жұмыстарының сапасы мен белгіленген мерзімде аяқталуын қатаң бақылауда ұстауды тапсырды.
Қазіргі таңда нысанда негізгі құрылыс жұмыстары қарқынды жүргізілуде. Атап айтқанда, кірпіш қалау жұмыстары толық аяқталған. Сонымен қатар, ғимарат ішінде инженерлік жүйелерді орнату жұмыстары жүргізілуде. Ішкі әрлеу жұмыстарының алғашқы кезеңі ретінде қабырғаларды сылау жұмыстары қолға алынған. Құрылыс алаңына 10 жұмысшы мен 4 арнайы техника жұмылдырылған.
Жоба толық аяқталғаннан кейін орталық балалар мен жасөспірімдердің шығармашылық және зияткерлік әлеуетін дамытуға арналған заманауи көпфункционалды мекеме ретінде пайдалануға беріледі. Нысан бір мезгілде 600 адамға дейін қабылдауға мүмкіндік береді.
Орталықтың жобасы балалардың жан-жақты дамуына қажетті барлық заманауи талаптарды ескере отырып әзірленген. Мұнда қосымша білім беру, шығармашылық, спорттық және зияткерлік бағыттағы түрлі үйірмелер мен секциялар жұмыс істейтін болады. Атап айтқанда, робототехника, бағдарламалау, тіл үйрету, қолөнер, сурет салу, музыка, би және басқа да бағыттар бойынша сабақтар ұйымдастырылып, жас буынның қабілетін ерте жастан дамытуға мүмкіндік жасалады. Сонымен қатар, түрлі танымдық іс-шаралар, байқаулар, семинарлар мен кездесулер өткізуге арналған арнайы залдар қарастырылған.
Жаңа нысанның пайдалануға берілуі аудан жастарының бос уақытын тиімді ұйымдастыруға, олардың шығармашылық ізденісін арттыруға және салауатты өмір салтын қалыптастыруға оң ықпал етеді. Заманауи құрал-жабдықтармен қамтамасыз етілетін орталықта балалардың қауіпсіздігіне де ерекше көңіл бөлініп, бейнебақылау жүйелері, өрт қауіпсіздігі талаптары және мүмкіндігі шектеулі азаматтарға арналған қолжетімді орта қарастырылмақ. Бұл өз кезегінде әрбір бала үшін қолайлы әрі қауіпсіз білім беру кеңістігін қалыптастыруға мүмкіндік береді.
Аудан басшылығы құрылыс жұмыстарының сапалы әрі уақытылы аяқталуы тұрғындар үшін маңызды екенін атап өтті. Сондықтан мердігер мекемеге құрылыс материалдарының сапасын қатаң бақылауда ұстап, белгіленген кестеден кешікпеу жөнінде нақты міндеттер жүктелді. Қазіргі таңда құрылыс барысы тұрақты бақылауға алынған және барлық жұмыстар бекітілген жоспарға сәйкес жүргізілуде.
Аталған жоба өңірдегі әлеуметтік нысандар санын арттырумен қатар, балалар мен жасөспірімдердің сапалы қосымша білім алуына, жаңа дағдыларды меңгеруіне және таланттарын дамытуына кең мүмкіндік береді. Бұл бастама Мемлекет басшысының балаларға қолайлы орта қалыптастыру, білім беру инфрақұрылымын жаңғырту және жастардың жан-жақты дамуына жағдай жасау жөніндегі тапсырмаларын іске асыру аясында жүзеге асырылып отыр. Жаңа орталықтың ашылуы Сарыағаш ауданының әлеуметтік әлеуетін арттырып, жас ұрпақтың болашағына салынған маңызды инвестиция болмақ.
