Сарыағаш ауданында тұрғындарды сапалы ауыз сумен қамтамасыз ету бағытындағы инфрақұрылымдық жобалар кезең-кезеңімен іске асырылуда. Соның бірі Ақжар елді мекенінде жүзеге асырылып жатқан ауыз су жүйесінің құрылысы.
Аудан әкімі Арман Абдуллаев құрылыс алаңына арнайы барып, жобаның орындалу барысымен танысты. Жұмыстардың сапасы мен қарқынын бақылаған аудан басшысы жауапты сала мамандары мен мердігер мекеме өкілдеріне құрылыс-монтаждау жұмыстарын белгіленген талаптарға сәйкес әрі белгіленген мерзімде аяқтауды тапсырды.
Қазіргі таңда нысан аумағында суқойманы қоршау, диаметрлері 20, 63, 110 және 160 миллиметрлік ауыз су құбырларын тарту, сондай-ақ су құдықшаларын орнату жұмыстары жүргізілуде. Бүгінгі күнге дейін жалпы ұзындығы 45 шақырымға жуық ауыз су желісі тартылып, 175 су құдықшасы орнатылған. Жоба толық аяқталғаннан кейін Ақжар елді мекеніндегі шамамен 7 мың тұрғын орталықтандырылған сапалы ауыз сумен қамтылады. Қазіргі таңда құрылыс-монтаж жұмыстарының шамамен 60 пайызы орындалған.
Құрылыс барысында қолданылатын материалдардың сапасы мен барлық инженерлік шешімдердің қолданыстағы құрылыс нормаларына сәйкестігі тұрақты бақылауда ұсталып отыр. Нысанда техникалық және авторлық қадағалау жүргізіліп, әрбір кезең белгіленген талаптарға сәйкес орындалуда. Мұндай бақылау жүйесі сумен жабдықтау желісінің ұзақ мерзімді әрі сенімді жұмыс істеуін қамтамасыз етіп, болашақта апаттық жағдайлардың алдын алуға мүмкіндік береді. Сонымен қатар су құбырларының өткізу қабілеті мен техникалық сипаттамалары елді мекеннің алдағы даму перспективасын ескере отырып жобаланған.
Ауыз сумен қамтамасыз ету жобалары өңірдегі әлеуметтік инфрақұрылымды кешенді дамыту жұмыстарының маңызды құрамдас бөлігі саналады. Инженерлік желілердің жаңартылуы жаңа тұрғын үйлердің салынуына, кәсіпкерлік нысандарының ашылуына және халықтың тұрмыс деңгейінің жақсаруына қолайлы жағдай қалыптастырады. Сонымен бірге тұрғындарды сапалы ауыз сумен қамту экологиялық қауіпсіздікті қамтамасыз етуге, табиғи ресурстарды ұтымды пайдалануға және қоршаған ортаны қорғауға бағытталған мемлекеттік саясаттың маңызды бағыттарының бірі болып табылады.
Сарыағаш ауданында инженерлік-коммуналдық инфрақұрылымды жаңғырту жұмыстары алдағы уақытта да кезең-кезеңімен жалғасады. Ауыз су, табиғи газ, электрмен жабдықтау және жол инфрақұрылымын дамытуға бағытталған жобаларды іске асыру арқылы ауыл тұрғындарына қолайлы өмір сүру ортасын қалыптастыруға басымдық берілуде. Бұл бастамалар Мемлекет басшысының халықты сапалы ауыз сумен толық қамтамасыз ету, өңірлердің инфрақұрылымын дамыту және азаматтардың өмір сүру сапасын арттыру жөніндегі тапсырмаларын жүзеге асырудың маңызды бағыты болып табылады. Жобаның табысты аяқталуы Ақжар елді мекенінің әлеуметтік-экономикалық әлеуетін арттырып, мыңдаған тұрғынның әл-ауқатын жақсартуға елеулі үлес қосады.
