Түркістан облысында инвестициялық жобалардың саны қайта қаралып, іске асу мүмкіндігі төмен бастамалардың орнына жаңа жобалар енгізілді. Нәтижесінде жыл соңына дейін жалпы құны 793,9 млрд теңге болатын 70 инвестициялық жобаны іске қосу жоспарланып отыр. Бұл жобалар 5 190 жаңа жұмыс орнын ашуға мүмкіндік береді.
Түркістан облысында инвестиция тарту енді тек жоба санын көбейтумен шектелмей, нақты нәтижеге бағытталып отыр. Биыл іске қосылуы жоспарланған 67 жоба қайта сараланып, олардың жүзеге асу мүмкіндігі жан-жақты талданған.
Талдау барысында іске асу тәуекелі бар 10 жоба анықталған. Олардың орнына жаңа 13 инвестициялық жоба енгізіліп, өңірдің жылдық жоспары қайта пысықталды.
Осылайша жыл соңына дейін Түркістан облысында 70 инвестициялық жобаны іске асыру көзделіп отыр. Жобалардың жалпы құны – 793,9 млрд теңге. Ең бастысы – бұл өндіріс орындары ашылып, жаңа кәсіптер пайда болып, 5 190 адам тұрақты жұмысқа орналасады деген сөз.
17 ЖОБА ҚАЗІРДЕН ІСКЕ ҚОСЫЛДЫ
Жыл әлі аяқталған жоқ, алайда алғашқы нәтижелер бар. Қазірдің өзінде өңірде жалпы құны 33,4 млрд теңге болатын 17 инвестициялық жоба пайдалануға берілді. Соның нәтижесінде 500-ге жуық жаңа жұмыс орны құрылды.
Ал қалған жобалардың іске қосылуы Түркістанның өндірістік және инвестициялық әлеуетін одан әрі арттыруға бағытталған.
Облыс әкімі Нұралхан Көшеров инвестициялық жобалардың жай ғана жоспар күйінде қалмай, белгіленген мерзімде нақты іске асуын ерекше назарға алды. Жауапты басқармалар мен аудан, қала әкімдеріне әр жобаның орындалуын тұрақты бақылау, инвесторлармен байланысты күшейту және туындаған мәселелерді созбалаңға салмай шешу тапсырылды.
ТҮРКІСТАНҒА КИВИ ДЕ КЕЛУІ МҮМКІН
Өңірге жаңа инвестиция тарту жұмыстары жаңа бағыттармен толығып келеді. Жуырда «Zhouzhi Country Jinzhou State-Owned Capital Investment and Operations» компаниясының өкілдерімен кездесу өтіп, киви өсіру тәжірибесі таныстырылды.
Шетелдік инвесторлар Түркістанның табиғи-климаттық жағдайы мен ауыл шаруашылығындағы мүмкіндіктеріне қызығушылық танытқан. Осыған байланысты Сайрам және Келес аудандарында жылыжай кешендерін орналастыруға қолайлы аумақтар көрсетілді.
Қазір инвесторлар алдағы жұмысты қамтитын нақты жоспар әзірлеуде.
Егер жоба жүзеге асса, Түркістанның ауыл шаруашылығы жаңа дақыл түрлерімен толығып, жылыжай өндірісінің жаңа бағыты қалыптасуы мүмкін.
БОЛАТ ӨНДІРІСІ ДЕ ТҮРКІСТАНҒА КЕЛУІ МҮМКІН
Өңірге қызығушылық танытып отырған инвесторлардың қатарында өндірістік компаниялар да бар.
«Sin Yuan Steel» компаниясы болат өндірісін Түркістан облысына көшіру және заманауи өндірістік кешен салу жөніндегі ұсынысын білдірді.
Бұл жоба жүзеге асқан жағдайда өңірдегі өнеркәсіптік өндірістің ауқымын кеңейтіп, құрылыс және металл өңдеу салаларының дамуына жаңа мүмкіндік бермек.
Ал «Sauran Solar Power» компаниясымен кездесуде Қожа Ахмет Ясауи кесенесінің сыртқы қорған қабырғасын салу жобасы талқыланды.
Қазір аталған бастамалардың барлығы жан-жақты зерделеніп, оларды іске асыру мүмкіндіктері қарастырылуда.
БАСТЫ МАҚСАТ – ҚАҒАЗДАҒЫ ЖОБА ЕМЕС, НАҚТЫ НӘТИЖЕ
Түркістандағы инвестициялық саясаттың негізгі бағыты – сан қуалау емес, экономикалық нәтиже беретін жобаларды іріктеу.
Жаңа өндіріс ашылса – жұмыс орны құрылады. Жұмыс орны көбейсе – халықтың табысы артады. Ал өндіріс көлемі артқан сайын өңір экономикасының да қуаты күшейеді.
Сондықтан биылғы 793,9 млрд теңгелік 70 жоба Түркістан үшін жай ғана инвестициялық жоспар емес. Оның артында жаңа кәсіпорындар, мыңдаған жұмыс орны, жаңа технологиялар және өңір экономикасының келесі кезеңі тұр.
Түркістан бүгінде инвестор үшін тек жері мен табиғи мүмкіндігі мол өңір емес, жаңа өндірістер мен тың жобаларды қабылдауға дайын экономикалық алаңға айналып келеді. Ендігі міндет – жоспарланған 70 жобаның әрқайсысын уақытында іске қосып, инвестицияны нақты нәтижеге айналдыру.
