Жетісай ауданында «Таза Қазақстан» бағдарламасы мен «Заң және тәртіп» қағидатын іске асыру аясында аудан әкімі Серік Үсенұлы Мамытовтың тапсырмасымен арнайы мобильді топ құрылып, аудан аумағында тазалық пен қоғамдық тәртіпті сақтау бағытындағы рейдтік жұмыстар күшейтілді.
Мобильді топтың қатысуымен саябақтарда, жағалау аймақтарында, демалыс орындарында, сондай-ақ, тұрғындар көп шоғырланатын қоғамдық орындарда арнайы рейдтік іс-шаралар ұйымдастырылды. Аралау барысында тазалық талаптарын бұзу мен қоғамдық тәртіпке қайшы әрекеттердің 34 дерегі анықталды.
Атап айтқанда, рейдтік шаралар кезінде қоғамдық орындарда, демалыс аумақтарында, саябақтар мен базар маңында орын алған құқық бұзушылықтар бойынша тиісті әкімшілік шаралар қолданылып, 28 тұлғаға қатысты әкімшілік хаттамалар толтырылды. Нәтижесінде құқық бұзушыларға жалпы сомасы 547 мың теңге көлемінде әкімшілік айыппұл салынды.
Аудан аумағында тазалық мәдениетін қалыптастыру, қоғамдық орындардағы тәртіпті сақтау және тұрғындардың қоршаған ортаға жауапкершілігін арттыру мақсатында өтіп жатқан рейдтік және профилактикалық іс-шаралар алдағы уақытта да тұрақты түрде жалғасады.
Рейдтік іс-шаралардың негізгі мақсаты – құқық бұзушыларды жауапкершілікке тарту ғана емес, ең алдымен тұрғындардың экологиялық мәдениетін қалыптастыру және қоғамдық орындарға ұқыпты қарау дағдысын нығайту. Осыған байланысты мобильді топ мүшелері тұрғындармен түсіндіру жұмыстарын жүргізіп, тазалық сақтау, тұрмыстық қалдықтарды арнайы орындарға тастау және қоғамдық тәртіпті сақтау талаптарының маңыздылығын кеңінен түсіндірді. Мамандар қоршаған ортаны таза ұстау – әрбір азаматтың ортақ міндеті екенін айтып, тұрғындарды туған өлкесінің тазалығына бейжай қарамауға шақырды.
Сонымен қатар рейд барысында кәсіпкерлік нысандарының иелері мен сауда орындарының жауапты тұлғаларына өздеріне тиесілі аумақтарды таза ұстау, абаттандыру жұмыстарын тұрақты жүргізу және санитарлық талаптарды сақтау жөнінде нақты ескертулер берілді. Жергілікті атқарушы органдардың мәліметінше, мұндай профилактикалық шаралар құқық бұзушылықтардың алдын алуға және аудан тұрғындарының қоғамдық жауапкершілігін арттыруға оң ықпал етуде.
«Таза Қазақстан» бағдарламасы аясында Жетісай ауданында көше бойларын, саябақтар мен гүлзарларды күтіп ұстау, заңсыз қоқыс орындарын жою, ағаш отырғызу және көгалдандыру бағытындағы жұмыстар жүйелі түрде ұйымдастырылып келеді. Бұл шаралар ауданның санитарлық жағдайын жақсартып қана қоймай, тұрғындарға жайлы әрі қауіпсіз өмір сүру ортасын қалыптастыруға мүмкіндік береді. Сонымен бірге жастардың, еріктілердің және қоғамдық ұйымдардың қатысуымен экологиялық акциялар өткізіліп, тұрғындардың табиғатқа деген жанашырлық көзқарасын қалыптастыруға ерекше көңіл бөлінуде.
Жетісай ауданында тазалық пен қоғамдық тәртіпті сақтау бағытындағы жұмыстар алдағы уақытта да жалғасып, бақылау шаралары тұрақты негізде жүргізілетін болады. Бұл Мемлекет басшысының экологиялық мәдениетті қалыптастыру, заң үстемдігін қамтамасыз ету және тұрғындардың өмір сүру сапасын арттыру жөніндегі тапсырмаларын іске асыру аясындағы маңызды бастамалардың бірі. Аудан тұрғындарының ортақ жауапкершілігі мен белсенділігі арқылы өңірдің тазалығы сақталып, қоғамдық тәртіптің нығаюына және қолайлы өмір сүру ортасының қалыптасуына негіз қаланады.
